ਉਸਾਰੀ ਅਧੀਨ ਫ਼ਲਾਈਓਵਰ ’ਤੋਂ ਹੇਠਾਂ ਡਿੱਗੀ ਕਾਰ

ਮਖੂ (ਫ਼ਿਰੋਜ਼ਪੁਰ) : ਮੋਗਾ ਮਖ਼ੂ ਹਾਈਵੇ ਦੇ ਰਸੂਲਪੁਰ ਰੇਲਵੇ ਫਾਟਕ ’ਤੇ ਨਿਰਮਾਣ ਅਧੀਨ ਅਤੇ ਅੱਧੇ ਅਧੂਰੇ ਬਣੇ ਫ਼ਲਾਈਓਵਰ ਤੋ ਅੱਧੀ ਰਾਤ ਤੋਂ ਬਾਅਦ ਜ਼ੈੱਨ ਕਾਰ ਹੇਠਾਂ ਡਿੱਗ ਕੇ ਚਕਨਾਚੂਰ ਹੋ ਗਈ। ਕਾਰ ਚਾਲਕ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ ਜਦਕਿ ਹਾਦਸੇ ਵਾਲੀ ਥਾਂ ਤੋਂ ਦੋ ਕੁ ਫੁੱਟ ਦੂਰੀ ’ਤੇ ਬੈਠਾ ਰਾਤ ਦਾ ਚੌਂਕੀਦਾਰ ਵਾਲ ਵਾਲ ਬਚ ਗਿਆ। ਜ਼ਖ਼ਮੀ ਕਾਰ ਚਾਲਕ ਨੂੰ ਸੜਕ ’ਤੋਂ ਲੰਘ ਰਹੇ ਟਰੱਕ ਚਾਲਕਾਂ ਅਤੇ ਜ਼ਖ਼ਮੀ ਦੇ ਸਾਥੀਆਂ ਨੇ ਬੜੀ ਮੁਸ਼ਕਿਲ ਨਾਲ ਕੱਢ ਕੇ ਐਂਬੂਲੈਂਸ ਰਾਹੀਂ ਮੋਗਾ ਭੇਜਿਆ। ਜਿੱਥੋ ਗੰਭੀਰ ਹਾਲਤ ਨੂੰ ਵੇਖਦਿਆਂ ਬਿਹਤਰ ਇਲਾਜ ਲਈ ਡੀਐੱਮਸੀ. ਲੁਧਿਆਣਾ ਵਿਖੇ ਰੈਫਰ ਕਰ ਦਿੱਤਾ ਗਿਆ। ਦਰਅਸਲ ਬੀਤੇ ਲੰਮੇ ਸਮੇਂ ਤੋਂ ਬਣ ਰਹੇ ਫਲਾਈਓਵਰ ਦੇ ਆਲੇ ਦੁਆਲੇ ਦੀ ਸਰਵਿਸ ਲੇਨ ਵੀ ਘੱਟੇ ਮਿੱਟੀ ਅਤੇ ਬੱਜਰੀ ਨਾਲ ਹੀ ਬਣੀ ਹੈ। ਫਲਾਈਓਵਰ ਦੇ ਰੇਲਵੇ ਅਧੀਨ ਆਉਂਦੇ ਸਪੈਨ ਅਜੇ ਨਹੀਂ ਬਣੇ। ਪਰ ਉਸਾਰੀ ਕੰਪਨੀ ਸੀਗਲ ਇੰਡੀਆਂ ਲਿਮਟਿਡ ਨੇ ਸੜਕ ਦੇ ਹਿੱਸੇ ’ਚ ਆਉਂਦੇ ਪਿੱਲਰ ਬਣਾ ਕੇ ਪੁਲ ’ਤੇ ਲੁੱਕ ਬੱਜ਼ਰੀ ਨਾਲ ਨਵੀਂ ਸੜਕ ਤਿਆਰ ਕਰ ਦਿੱਤੀ ਹੈ। ਬਾਵਜੂਦ ਇਸ ਸਭ ਦੇ ਨਾ ਤਾਂ ਸਰਵਿਸ ਲੇਨ ਤਿਆਰ ਕੀਤੀਆਂ ਗਈਆਂ ਹਨ। ਨਾ ਪੁਲ ਦੀ ਸ਼ੁਰੂਆਤ ਵੇਲੇ ਕੋਈ ਕੰਧ ਬਣਾਈ ਤੇ ਨਾ ਹੀ ਕੋਈ ਹੋਰ ਰੁਕਾਵਟ ਖੜੀ ਕੀਤੀ ਹੋਣ ਕਰ ਕੇ ਚਾਲਕ ਅਕਸਰ ਭੁਲੇਖ਼ਾ ਖਾ ਜਾਂਦੇ ਹਨ। ਬਦਕਿਸਮਤ ਹਾਦਸਾ ਗ੍ਰਸਤ ਕਾਰ ਨੰ: ਪੀਬੀ05ਡਬਲਿਯੂ0879 ਸਵਾਰ ਕੁਲਵਿੰਦਰ ਸਿੰਘ ਪੁੱਤਰ ਸਵ: ਦਰਸ਼ਨ ਸਿੰਘ ਵਾਸੀ ਕੋਕਰੀ ਕਲਾਂ ਮੋਗਾ ਦੂਜੀ ਗੱਡੀ ਸਵਾਰ ਸਾਥੀਆਂ ਸਮੇਤ ਅੰਮ੍ਰਿਤ ਵੇਲੇ ਦਰਬਾਰ ਸਾਹਿਬ ਦੇ ਦਰਸ਼ਨ ਕਰਨ ਲਈ ਅੱਧੀ ਰਾਤ ਤੋਂ ਬਾਅਦ ਇਥੋਂ ਲੰਘ ਰਿਹਾ ਸੀ ਅਤੇ ਹਾਦਸੇ ਦਾ ਸ਼ਿਕਾਰ ਹੋ ਗਿਆ।